البوليس والببغاء

هذا المقال من وحي وقفة المعلمين يوم 11 جويلية 2016 وفي انتظار تحرك الأساتذة يوم 27 جويلية للمطالبة بحقهم في الوطن

كان يا مكان في قديم الزمان كان ثما قمرق حالل في القصبة
وكان صاحب القمرق مربي ببغاء في المحل
هيا نهار من النهارات دخل بوليس باش يوخو باكو دخان
هاكل الببغاء غزرلو وفز يغني غناية ولد الكانز: ‘البوليسية كـــ…’
صاحب المحل خضار زراق وغص بعرقو
ودز فاها يفدلك مع البوليس، وعطاه باكو الدخان بلاش باش سلكها
وبعد لا خرج البوليس، دار للبباغيو ووصاه باش وقتلي يدخل بوليس يقعد ساكت وإلا ينتفلو ريشو ويرميه لقطاطس القصبة
هاكل الببغايو قعد نهار كامل ساكت خايف على ريشو
لين دخل بوليس للقمرق باش يقضي
قعد يغزرلو على جنب وساكت
البوليس غزر لصاحب القمرق وقالو
-يعجبك في الدنيا الكلبة
-آش بيك سي البوليس
-توا يجي المعلمين الي يخلصو في الملاين ومرتاحين عام كامل ،يعملو اعتصام يحبو على الزيادة
-لا ما يجيش
-وكمل مخرجينا في هل سخانة يخدمو فينا
-لا ما حقوش
-هونا حتى أحنا قمنا بالواجب، كلينالهم الكبدة متاعهم بطريحة، وشدينا كمشة منهم باش نعديولهم قضية تهديد أمن دولة
-عندكم 60 ألف حق، قالك معلمين قالك أساتذة
هاكل الببغايو طول الهدرة وهو يغزر للبوليس بنص عين، وحاطط ايدو على فمو خايف على ريشو
سكت سكت سكت ومن ثما طرشق
-يا عرفي تنتفلي ريشي ، تقصلي رقبتي ما يهمنيش
يا عرفي موش قتلك البوليسية ‘كـــ…..’ وكمل غناية ولد الكانز
وفات الحكاية
في انتظار كونو النبارة ينتفولي ريشي، تحبوش نحكيلكم حكاية الثور الأبيض والثور الأسود
لأنو البارح الثور الأبيض تم ذبحه في القصبة….

weld15

1 Star2 Stars3 Stars4 Stars5 Stars (No Ratings Yet)
Loading...