بريبش ما صحلوش

الخبر:  نقابة الثانوي تؤكد تراجع وزارة التربية عن الاتفاق وتقرر الانسحاب من المفاوضات

الجواب

يحكيو على راجل زوالي، و ما في حالوش، اسمو بريبش. عندو كمشة شهايد و قاري 15 عام بعد الدكتوراة. لكنو الله غالب ملغ، ما  يعرفش يركب كلمتين على بعضهم، و ديما مزهب روحو قدام خلق ربي. 
هيا عندو خوه الكبير قافز، و عندو بيستونات قوا و كتاف عراض، دبرلو بلاصة محترمة في مؤسسة حكومية، يعني مسمار في حيط. و قالو اخدم على روحك باش تكون و تعرس كيما بقية خلق ربي.

بريبش، خدم جمعة، و مشا خطب وحدة بنت فاميليا، و من كثر فرحتو بخطيبتو قعد ينكز من قناة لقناة يحكي على تاريخها و شرفها المشرف. و قاعد يوعد فاها بكونو الأيامات الجاية باش تكون خير ملي تعدات. حللها في الجنة ذراع، سكنى بلاش، و تعدية في السبيطارات بلاش، و تنقل بلاش، تي وصل وعدها حتى باش يسكنها في حومة دار بوها، بالرغم من كون بريبش يسكن بعيد علاها أكثر من 200 كم.

لكن الخطيبة كانت بنت أمها، نقابية بامتياز، و شيحتلو ريقو، و كل نهار تعملو عركة. و قالتلو لوكان تحبني بالحق قول لخوك الكبير يعطيني شهرية باهية. هيا كثر العرك ما بيناتهم، و كثرت الابسيونات متاع عقاب الليل(تونيزيانا، تيليكوم و اورنج). لكن من غير فايدة.

لكن قلب بريبش الكبير رق لحبو الأول، و استدعا كبارات العايلات باش يوضعو حد للمشاكل و لسهريات آخر الليل. هيا اجتمعوا في نهار كبير من أيامات عطلة الربيع، و حكاو و تشابكو كيما حبو و اشتهاو. في اللخر تفاهمو باش يعطيو للخطيبة شهرية محترمة و يصححو على الصداق نهار الأحد.

كثرت الزغاريد، و طبطب خو بريبش على كرشو، و هو فرحان بالانجاز العظيم الي عملو، و مشا شرا عاصي باش يذبحو لنهار اليوم المشهود، نهار الاحد.

هيا تلمت الاحباب و جاو الجيران و الأقارب ، العدو و الحبيب، كلهم تلمو باش يشهدو عقد قران بريبش بخطيبتو النقابية. تذبح العاصي، و تفرق القازوز، و قعد بريبش و خطيبتو مع الشهود على الطاولة،

قرا العدل الفاتحة، و عطا لبريبش ستيلو بيك باش يصحح على العقد. 

تململ بريبش، كح و عطس، غزر لخوه الكبير و طلب منو باش يقربلو.

قربلو، و وكوكلو في وذنو

بريبش ما صحلوش

شنوة، قالو خوه

بريبش ما يحبش يعرس، بريبش ما صحلوش

هبط عليه خوه بداودي لا يقرا و لا يكتب، و لعن القراية و الـ15 شهادة بعد الدكتوراة. و شدلو ايدو باش يصحح، و عرسو و رجع بريبش إلى البيت مع مرتو فرحا مسرورا، و في رأسه درفاغة كبيرة …

ملاحظة: أي تشابه في الأسماء أو الصفات أو الأحداث هو عن سبق الاصرار و الترصد. 

ملاحظة أخرى : هذه القصة من تراث مدينة مساكن (بتصرف)

One thought on “بريبش ما صحلوش

  1. marwa

    ibribech i7sol meskin

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

You may use these HTML tags and attributes:

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>